Super gol, kualifikim, Lojtari i Ndeshjes

Milot Rashica po shkëlqen në Gjermani. Viti 2019 ka qenë i jashtëzakonshëm për të.

Tashmë Rashica është shndërruar në lider në skuadrën gjermane të Werder Bremen, si në kampionat ashtu edhe në Kupën e Gjermanisë.

Të mërkurën mbrëma, Werderi eliminoi Schalken në udhëtim me rezultat 0:2, ku golin e parë e shënoi Milot Rashica, shkruan albinfo.ch.

Rashica shënoi një super gol nga distanca, duke dëshmuar për formën e jashtëzakonshme nëpër të cilën po kalon. Werder tashmë ndodhet në mesin e katër skuadrave më të mira në Kupën e Gjermanisë

“Milot Rashica më 2019: Në 11 paraqitje 9 gola”, ka shkruar faqja e UEFA-s në gjuhën gjermane.

Pas ndeshjes, Rashica u zgjodh edhe futbollisti më i mirë i ndeshjes.

Futbollisti nga Vushtrria ka shënuar edhe tetë gola dhe dy asistime në Bundesligë.