Restorantet e Zvicrës: Më shumë mysafirë, më pak fitim

Shpenzimet që zviceranët kanë bërë në restorante në vitin 2018 kanë qenë 22.9 miliardë franga ose kanë pësuar një rënie prej 3 për qind

Në vitin e kaluar në Zvicër restorantet kanë pasur më shumë frekuentues por më pak të ardhura. Kështu, sipas federatës së gastronomisë së Zvicrës Gastro Suisse, zviceranët gjatë vitit 2018 kanë shpenzuar më pak para për të konsumuar në restorante, shkruan srf.ch. Shpenzimet në fjalë kanë qenë 22.9 miliardë franga ose kanë pësuar një rënie prej 3 për qind.

Ndërsa kur jemi te shtimi i numrit të frekuentuesve të restoranteve përkundër rënies së konsumit në to, në këtë degë të ekonomisë në vitin 2018 janë krijuar rreth 10.000 vende të punës me orar të plotë dhe të pjesshëm.

Ndërkaq hoteleria zvicerane gjatë vitit të kaluar ka shënuar një rekord, transmeton albinfo.ch. Janë regjistruar 38.8 milionë bujtje në hotelet e Zvicrës, që është për 3.8 për qind më shumë se një vit më parë. Kjo ka ndodhur ndërkohë që qarkullimi i llogaritur për një bujtje ka pasur një rënie të vogël, prej 0.1% shkruan Gastro Suisse.

---