Ambasadorja Gjonbalaj vizitoi fëmijën që humbi nënën

Blinardi është fëmije shumë i dashur, i qetë, flenë dhe ushqehet me rregull dhe sidomos ka dëshirë të jetë midis shumë njerëzve, rrëfen familja italiane që kujdeset për të

Ambasadorja e Kosovës në Romë, Bukurije Gjonbalaj ka vizituar familjen italiane e cila kujdeset për Blinard Beqajn, djalin 10 muajsh të familjes Beqaj nga Davdofci i Shtimes, e cila u aksidentua në Itali, gjatë rrugës për të ikur drejt Francës, në kërkim të një jete më të mirë.

 

Në këtë aksident kishte humbur jetën nëna e Blinardit, Edona Beqaj ndërsa në gjendje kome është babai, Agron Beqaj. Djali 10 muajsh i mbijetuar i familjes strehohet dhe përkujdeset nga një familje italiane.

 

Ambasadorja Gjonbalaj qëndroi në këtë familje dhe e pa se si po rritet Blinardi i vogël.

 

“Familja qe kujdeset për të thotë se Blinardi është fëmijë shumë i dashur, i qetë, flen dhe ushqehet me rregull dhe sidomos ka dëshirë të jetë midis shumë njerëzve, nuk do të rrijë  vetëm asnjë minutë”, citojnë deklaratën e ambasadores mediet në Prishtinë.

 

Po ashtu, ambasadorja Gjonbalaj ka vizituar edhe Agron Beqajn në spitalin e Allesadrias, ku përmes bisedës me lejen dhe rekomandimin e mjekut u mundua t’ia stimulojë emocionet duke i folur në gjuhën shqipe dhe duke i treguar se djali Blinardi është mirë dhe shëndosh.

 

“Ne momentet kur përmendej Blinardi, Agroni tregonte shenja se ai kuptonte dhe dëgjonte”, thuhet më tej në raport.

 

Nga ana juridike, Agronit i është siguruar një sigurim shëndetësor, pastaj të gjitha trajtimet do t’i ketë falas nga shteti italian.

 

Ndërsa, çështja e Blinardi është më delikate ngase gjykatësi tutelar për fëmijët e mitur thotë se duhet te pritet zgjimi nga koma i babait qe t`i japë leje familjes se ngushtë, konkretisht babait të Agronit, Milazim Beqaj, për mbikëqyrjen e Blinardit.

 

Ndryshe më 26 dhjetor, Agron Beqaj, 23-vjeçar, po udhëtonte në një automjet me bashkëshorten e tij Edonën, 22 vjeçe, dhe me djalin e tyre Blinardin 10 muajsh nëpër Itali, me destinacion Francën.

 

Ata u aksidentuan në Aleksandri, afër Romës, ku ka mbetur e vdekur Edona, është lënduar rëndë dhe edhe më tej është në gjendje kome Agroni, ndërkohë që Blinardi 10 muajsh ka shpëtuar pa asnjë lëndim.

 

Ata, ishin duke udhëtuar me automjetin e një shqiptari nga Prizreni për të cilin familja Beqaj e di se quhej Kujtim Martinaj dhe është nga rrethina e Prizrenit, me të cilin familjarët Beqaj kanë udhëtuar nga Serbia me destinacion Francën.

 

Sipas të dhënave nga rrethi familjar, bashkëshortët Beqaj me të birin e tyre janë nisur me rreth një mijë euro në xhep, të cilat mezi i kanë siguruar, pa pasur dikë që i pret në Francë, por vetëm duke shpresuar të gjenin zgjidhje për vendqëndrim atje.

 

---