Presidenti i Kosovës: Vlerat e luftës sonë janë të paprekshme

Presidenti i Republikës së Kosovës, Hashim Thaçi, me rastin Ditës së dëshmorëve të Pejës ka thënë se vlerat e luftës së Kosovës janë të paprekshme.

“Edhe pse kaluan 20 vjet, çdo ditë e më tepër shihet se vlera e Ushtrisë Çlirimtare të Kosovës është një vlerë e paprekshme, një vlerë që bashkon qytetarët pa dallim partie, ideologjie apo lokaliteti. Është vlera më sublime dhe e shenjtë e kombit tonë, shtetit tonë. Është një vlerë që e fuqizon çdo ditë e më tepër shtetin tonë”, ka thënë presidenti Thaçi.

Kreu i shtetit u ka thënë familjeve dhe fëmijëve të dëshmorëve se duhet të ndjehen krenarë me familjarët dhe prindërit e tyre, ashtu sikurse ne që ndjehemi me bashkëluftëtarët tanë që dhanë gjithçka që Kosova të jetë e lirë, të jetë e pavarur dhe të lëvizë gradualisht drejt anëtarësimit në NATO dhe Bashkimin Evropian.

Presidenti Thaçi ke theksuar se gjithmonë duhet të kujtojmë me krenari luftën që e kemi zhvilluar dhe çdo herë kur respektojmë ato vlera vetëm sa do të forcohemi edhe si shoqëri, edhe si shtet.

I pari i vendit ka thënë se angazhimi i fundit i Kongresit Amerikan, i mikut të madh të kombit tonë, Eliot  Engel, është një kontribut dhe angazhim i jashtëzakonshëm dhe historik për të vërtetën, për atë që ka ndodhur në Kosovë.

“Fjalët e kongresistit Engel dhe të gjithë të pranishmëve ishin edhe një stimulim i madh për ne të gjithë që të vazhdojmë të kërkojmë drejtësi, të punojmë edhe më tepër për drejtësi”, ka theksuar ai.

Presidenti Thaçi ka thënë se beson që Parlamenti i Kosovës në të ardhmen e afërt do ta nxjerrë edhe rezolutën për gjenocidin e Serbisë në Kosovë dhe të gjithë kryerësit e atyre krimeve do të ballafaqohen me drejtësinë.