65% të zviceranëve janë pro ashpërsimit të rregullave për armëmbajtje

Dy të tretat e trupit votues vazhdon të mbetet pro qëndrimit evropian e kundër atij të mbështetur nga forcat konservatore të Zvicrës, i cili kërkon më shumë liri në armëmbajtje

Sikur të votohej në fund të prillit, 65 për qind të zviceranëve me të drejtë vote do të përcaktoheshin në favor të direktivës së re të BE-së për armëmbajtje. Këtë rezultat e tregon sondazhi i dytë në lidhje me këtë temë që e ka realizuar Institutit GFS Bernë në emër të SRG, shkruan sda.ch.

Rezultatet e këtij sondazhi po publikohen në kohën kur kanë mbetur më pak se dy javë deri në votimin gjithëpopullor mbi këtë temë, që bëhet më 19 maj.

Ky rezultat tregon se dy të tretat e trupit votues vazhdon të mbetet pro qëndrimit evropian e kundër atij të mbështetur nga forcat konservatore të Zvicrës, i cili kërkon më shumë liri në armëmbajtje, transmeton albinfo.ch. Në periudhën nga spondazhi i kaluar, i realizuar në fund të marsit, raporti në mes të dy palëve ka mbetur praktikisht i pandryshuar.

Sipas GFS, votuesit në Zvicër edhe në këtë çështje mbeten të përçarë mbi bazë të simpative të tyre partiake. Votuesit e SVP-së janë qartas kundër qëndrimit që hidhet në votë ndërsa ata të partive tjera, qartas pro këtij qëndrimi.

SVP dhe një pjesë e elektoratit tradicional konservator po bëjnë fushatë kundër ashpërsimit të rregullave për armëmbajtje. Ata thonë se në rast se qytetarëve zviceranë u imponohet rregullimi strikt i BE-së rreth kësaj çështjeje, atyre po u mohohet një pjesë e dokeve dhe zakoneve që ata i kanë, shkruan albinfo.ch. Me këtë, sipas tyre ata do të detyroheshin të heqin dorë nga “të qenët zviceranë”, duke iu referuar traditës së zviceranëve për të mbajtur armë në shtëpi.

---