Edhe një shqiptar drejt Baselit

Pas Albian Ajetit, Taulant Xhakës dhe Edon Zhegrovës, ish-kampioni pritet të përforcohet me edhe një futbollist shqiptar

FC Baseli pritet të bëjë disa ndryshime për sezonin e ardhshëm, ku priten largime dhe përforcime.

Njëri nga të larguarit mund të jetë portieri Jonas Omlin (25), i cili mund të shkojë drejt Bundesligës gjermane, shkruan ‘Blick’.

Silvan Widmer i rikthyer (26) është përmirësuar vazhdimisht gjatë gjithë sezonit dhe pritet të qëndrojë, ashtu si edhe kapiteni Marek Suchy (31). Veteranët Fabian Frei (30), Valentin Stocker (30) dhe Luca Zuffi (29) gjithashtu do të luajnë një rol kyç në sezonin e ardhshëm, përcjell albinfo.ch.

Edhe pse Taulant Xhaka (28) ka një kontratë edhe për dy vjet dhe konsiderohet si një figurë identifikimi, interesimi i klubeve nga Bundesliga dhe Spanja, mund të bëjë që ai të ndërrojë mjedis, shkruan tutje albinfo.ch.

Dimitri Oberlin (21) është në huazim te Empoli dhe është gati të zbresë me toskanët. Pas refuzimit të një oferte nga Kina gjatë dimrit, ai tani mund të ndjekë këtë rrugë pavarësisht nga çdo gjë. FCB ende shpreson se ai mund të kthejë gati gjashtë milionë franga zvicerane, që i kishte shpenzuar për ta transferuar nga Salzburgu.

Por, Baseli pritet të bëjë edhe disa transferime, kurse në krye të listës është Pajtim Kasami nga Sioni. Por presidenti Christian Constantin dëshiron më shumë se dy milionë franga për liderin e mesfushës.

---