“Artsy” shkruan për pavijonin e Kosovës në Bienalen e Venedikut

VENICE, 11.05 - 24.11.2019 BIENNALE ARTE 2019 58TH INTERNATIONAL ART EXHIBITION

Faqja prestigjioze globale dedikuar artit, Artsy, i ka kushtuar një shkrim pavijonit të Kosovës mes shteteve të mëdha garuese të Amerikës, Francës, Brazilit dhe Indisë, duke e konsideruar si njërin prej 10 më të mirëve në këtë edicion të Bienales së Artit në Venedik.

Projekti “Albumi Familjar” i artistit Alban Muja ka arritur vlerësimin meritor, pasi e ka rikthyer në vëmendje vuajtjen e fëmijëve refugjatë gjatë luftës në Kosovë – fotografitë e të cilëve 20 vjet më parë zinin faqet e gazetave kudo në botë.

Muja ka përzgjedhur disa fotografi të këtyre fëmijëve që asokohe ishin publikuar në mediat botërore dhe dy dekada më pas i ka gjetur protagonistët tashmë të rritur të këtyre imazheve, të cilët i kanë ndarë rrëfimet  e tyre.

Mes shpalosjes së temës dhe qasjes multimediale të artistit kosovar, Artsy gjithashtu përmend dritën e rrëfimit të situatës së asaj kohe që reflekton edhe në gjendjen e refugjatëve të ditëve të sotme, raporton televizioni KlanK.

“Videot e paraqitura nuk janë vetëm përshkrime emocionuese të një krize të dikurshme, por ato gjithashtu rezonojnë me narrativat bashkëkohore të refugjatëve në mbarë botën”, shkruan ky medium, transmeton albinfo.ch.