Ambasada amerikane nuk do t’u japë vizë personave të korruptuar

Ambasada Amerikane në Kosovë ka thënë se nuk do t’u japë vizë personave të korruptuar.

Këtë njoftim ambasada e ka bërë përmes një komunikate, duke thënë se qytetarët e Kosovës meritojnë një sistem drejtësie që mban individët përgjegjës për veprimet e tyre korruptuese.

“Lidhur me këtë, Ambasada e SHBA-së është duke ndërmarrë hapa për të siguruar që individëve, të cilët janë të përfshirë në rastet e mëdha të korrupsionit, të mos u lëshohen vizat për udhëtim në Shtetet e Bashkuara për biznes apo turizëm”, thuhet në njoftim.

Sipas ambasadës: “Është praktikë e zyrtarëve konsullorë që të shqyrtojnë faktet për çdo aplikim për vizë, duke përfshirë edhe çdo informatë negative lidhur me aplikuesin, dhe që të përcaktojnë përshtatshmërinë për marrje të vizës në bazë të ligjeve të SHBA-së. Sipas nevojës, ne vazhdimisht i peshojmë akuzat dhe dëshmitë për korrupsionin dhe krimin e organizuar gjatë vendimmarrjes për viza, në mënyrë që t’i kufizojmë ata që kontribuojnë në këto probleme nga marrja e vizave për udhëtim në Shtetet e Bashkuara”.

Ata kanë thënë se do të vazhdojnë të shprehim publikisht shqetësimin se askush nuk është duke u mbajtur përgjegjës, përfshirë zyrtarë të Kosovës, për korrupsionin dhe krimin e organizuar që janë qartësisht prezente në rastet Pronto, viza italiane, ikja nga burgu i Dubravës, Toka dhe Apex, si dhe në raste të tjera të ngjashme.