A do të paditet deputetja Flora Brovina, PDK-ja e mbron

Prokurorja e prokurorisë Speciale, Drita Hajdari, e cila ka intervistuar deputeten Flora Brovina pas publikimit të fotos, e cila po dyshohet se është e falsifikuar, nuk ka treguar nëse do të ngre padi ndaj saj.

Hajdari tha se tashmë është herët të jepet një përgjigje, porse shtoi se intervistimi i saj është vetëm hapi i parë, transmeton albinfo.ch.

“E kam intervisuar unë personalisht lidhur me publikimin e fotos dhe mes tjerash ka deklaruar se fotoja është nga viti 2003, thotë se ka ardhur në posedim të saj përmes të disa aktivistëve nga Gjakova, ka deklaruar se i ka besuar fotos dhe e ka publikuar. Unë e kam pyetur që a e ka paraqitur rastin në prokurori, ajo ka thënë se nuk e kam ditur që e kam obligim”, ka deklaruar Hajdari.

Ndërsa kryetari i Kuvendit, njëherësh kryetar i PDK-së, Kadri Veseli, ka pranuar se veprimi i  deputetes Flora Brovina ishte një gabim i madh, por i paqëllimtë.

Ai ka thënë se gjurmët e gjenocidit serb nuk bazohen në një foto, por ato gjenden çdo kund në Kosovë.

“Gjenocidi serb nuk e ka bazonte një foto e as te një personi. Tribunali ndërkombëtar për krimet serbe në Kosovë do të themelohet. Jam këtu për të pyetur se a duhet të jetë më i fortë dështimi apo drejtësia për popullin tonë. Brovina ka bërë gabim të madh, por unë besoj se e ka bërë pa dashje, pasi e njoh Brovinën”, ka thënë ai.