Shqipëri: Afro 26% e bizneseve menaxhohen nga gratë

Zgjerimi i aktivitetit ekonomik vitet e fundit ka ecur paralelisht edhe me rritjen e angazhimit të grave në drejtimin e bizneseve të ndryshme.

Instituti i Statistikave bën të ditur se në fund të vitit 2018 gratë menaxhuan 25,7 % të ndërmarrjeve aktive gjithsej në vendin tonë.

Të ndara sipas strukturës në rrethe, rezulton se në Tiranë është numri më i lartë i grave që menaxhojnë bizneset, më pas vijnë bashkitë e tjera, si Durrësi, Fieri etj., shkruan ATSH.

Sipas INSTAT, në ndërmarrjet aktive që operojnë në Bashkinë e Tiranës gratë menaxhojnë 33,2 % të tyre.

Ndërmarrjet e drejtuara nga gratë janë kryesisht ndërmarrje me 1- 4 të punësuar, të cilat zënë 91,2 % të numrit të përgjithshëm të ndërmarrjeve të drejtuara nga gratë.

Ndërsa në ndërmarrjet me 50 e më shumë të punësuar, gratë drejtojnë 19,6 % të ndërmarrjeve.