Nesër ndeshja e yjeve në Prishtinë

Mbrëmja e së shtunës u takon yjeve të futbollit shqiptar. Më 15 qershor, në orën 20:00, yjet zbresin në stadiumin “Fadil Vokrri” në Prishtinë.

Ekipi i krijuar nga Granit Xhaka me shokë dhe ekipi i krijuar nga Milot Rashica me shokë do të përballen me njëri-tjetrin, për të dhuruar spektakël për të gjithë dashamirët e futbollit në Kosovë e më gjerë, përcjell albinfo.ch.

Në njëzetvjetorin e lindjes së një jete të re, stadiumi “Fadil Vokrri” do të jetë më i ndriçuar se kurrë nga yjet e futbollit që përditë i bëjnë dritë emrit të Kosovës nëpër botë.

Kjo ndeshje organizohet dhe mbështetet nga Federata e Futbollit e Kosovës dhe Komuna e Prishtinës. Biletat për tribunat jug dhe veri do të jenë falas, derisa biletat për tribunën lindore kushtojnë 2 euro, kurse ato për tribunën perëndimore 3 euro. Të gjitha të hyrat nga shitja e biletave do t’u ndahen 10 familjeve në nevojë.