Veliaj: Shqiptarëve nga Kosova dhe Lugina, nuk u kërkohet leje pune

"Ne nuk i konsiderojmë të huaj shqiptarët e Luginës së Preshevës, çdo student i Luginës mund të punësohet lirshëm në Shqipëri"

Shqiptarët nga Kosova dhe nga Lugina e Preshevës në të ardhmen nuk do të kenë nevojë për leje pune që të punojnë në Shqipëri.

Ministri i Mirëqenies Sociale Erjon Veliaj bëri me dije një vendim të fundit të qeverisë Rama, sipas të cilit çdo qytetar nga Kosova dhe Lugina e Preshevës mund të punësohet në Shqipëri, pa pasur nevojë të pajiset me leje pune.

“Liberalizuam tregun e punës me Kosovën, ndërsa sot hoqëm procesin burokratik të pajisjes me leje pune, shkruan indeksonline.net. Shqiptarët nga Kosova nuk kanë nevojë të aplikojnë për leje pune apo për certifikata pune. Çdo qytetar i Kosovës dhe nga Lugina e Preshevës mund të aplikojnë për punë në Shqipëri”, tha ai.

Sipas Veliajt, në ndryshim nga qeveria tjetër, “Ne nuk i konsiderojmë të huaj shqiptarët e Luginës së Preshevës, çdo student i Luginës mund të punësohet lirshëm në Shqipëri”, shtoi.