Haradinaj, më 1 korrik në Francë, për liberalizimin e vizave

Kryeministri i Kosovës, Ramush Haradinaj, do të takohet me ministrin e Brendshëm të Francës, Christophe Castaner, për liberalizimin e vizave, përcjell albinfo.ch.

Lajmin e ka bërë të ditur vetë Haradinaj përmes një postimi në Facebook, teksa ka njoftuar se takimi do të mbahet më 1 korrik 2019.

Lidhur me këtë vizitë, Haradinaj sot është takuar me ambasadorin e Francës në Kosovë, Didier Chabert.

“Me qëllim të kordinimit dhe avancimit të agjendës së Kosovës për liberalizimin e vizave dhe integrimin europian, partneritetit bilateral politik dhe ekonomik me Francën, Qeveria ka finalizuar përgatitjet dhe argumentet e saja, të cilat ia paraqita Ambasadorit Chabert dhe të cilat do t’i paraqesim edhe para zyrtarëve francezë. Në këtë vizitë do të zhvilloj takime edhe me përfaqësues të tjerë institucionalë dhe politikë të Francës, me qëllim të thellimit të bashkëpunimit bilateral dhe kërkimin e mbështetjes për avancimin e agjendës europiane të vendit”, ka shkruar Haradinaj.