Shtohet numri i të papunëve “me përvojë” të gjatë

Gjithnjë më shpesh po ndodhë që të papunët të mos mund të gjejnë punë për në një periudhë më të gjatë se një vit

Dukuria e mbetjes pa punë për një kohë të gjatë në Zvicër po vjen duke u bërë më e pranishme se më parë. Gjithnjë më shumë persona në moshë të shtyrë mbeten pa punë edhe pasi të kenë mbaruar periudhën e mbështetjes nga zyrat e papunësisë (RAV), shkruan srf.ch.

Raporti social i Zyrës Federale për Statistikë (BFS), i publikuar sot, tregon detaje lidhur me këtë dukuri, transmeton albinfo.ch. Ky raport publikohet një herë në katër vjet.

Edhe pse sipas raportit në fjalë, shkalla e të papunëve, me rreth 6 për qind të popullatës, është relativisht stabile, gjithnjë më shpesh po ndodh që të papunët të mos mund të gjejnë punë për në një periudhë më të gjatë se një vit. Në vitin 2018 kjo vlente për 4 nga 10 të papunët ndërsa më të goditurit janë të moshuarit.

Në pesë vjetët e fundit, sipas BFS-së, është rritur edhe shkalla e varfërisë, që do të thotë se pjesa e popullatës me të ardhura më të ulëta ka shënuar rritje. Në vitin 2017, në këtë kategori kanë bërë pjesë 8% të popullatës zvicerane. Në të njëjtën kohë, numri i personave që marrin ndihma sociale ka mbetur stabil

Sqarim rreth shkallës së papunësisë dhe përqindjes së të papunëve në popullatë: shkalla zyrtare e papunësisë në Zvicër aktualisht është shumë më e ulët se shifra e përmendur më lart, pra rreth 2.7%, shkruan albinfo.ch Por, kjo përqindje përbëhet vetëm nga personat e paraqitur në zyrat regjionale të ndërmjetësimit të punës (RAV). Ndryshe, një “shifër e errët” del në shesh kur si të papunë llogariten edhe personat që e kanë mbaruar fazën e mbështetjes nga RAV dhe ndërkohë nuk kanë gjetur punë dhe nuk e kanë arritur ende moshën e pensionimit.

---