Konfiskohen qindra kilogramë drogë

Në operacionin e koduar “Kokakina”, Policia e Koosvës dhe ajo e Shqipërisë kanë konfiskuar më shumë se 20 kilogramë kokainë dhe qindra kilogramë drogash të tjera

Policia e Kosovës dhe ajo e Shqipërisë, në një operacion të përbashkët, kanë asgjësuar një rrjet të organizuar të trafikut me narkotikë si dhe kanë konfiskuar një sasi të madhe të drogës. Në operacionin e koduar “Kokakina”, janë konfiskuar më shumë se 20 kilogramë kokainë dhe qindra kilogramë drogash të tjera.

Sipas një njoftimi, dy strukturat policore, mbështetur në informacionet e sigurta nga  rrugët operativo-hetimore, kanë realizuar aksionin duke asgjësuar këtë rrjet. Madje që është e veçanta e këtij aksioni, janë zbuluar dy laboratorë për përzierjen e drogave, njëri në Kosovë dhe tjetri në Shqipëri.    

Si rezultat i hetimeve më 12.06.2014 rreth orës 07:00 në pikën kufitare ( Kosovë Shqipëri) në Vermicë, nga Policia e shtetit të Shqipërisë (në pjesën e Republikës së Shqipërisë), është ndaluar një person i dyshuar, i cili nga Shqipëria transportonte shtatë (7) kilogramë lëndë narkotike e dyshuar kokainë.

Si pjesë e operacionit policor, Policisë së Kosovës e ka bastisur një shtëpi në rajonin e Pejës. “Gjate bastisjes së shtëpisë është gjetur një lokacion i improvizuar si laborator në të cilin janë gjetur pajisje që shërbejnë për matje, përzierje dhe paketim të substancës narkotike”, njofton policia.

Në këtë lokacion në cilësi të provave materiale janë gjetur dhe sekuestruar: 18 kg.e 235gr, kokainë; 5 kg e 955 prekursorë; 8 litra acid klorhidrikë; 246  litra aceton

7 litra hidro-kiselinë; Pajisje laboratorike: (mikserë, sita, korita, ventilatorë, llampa, dorëza, peshore etj); 2 vetura etj.

Si të dyshuar për veprimtari kriminale të krimit të organizuar dhe trafikim me substanca narkotike janë arrestuar; V. T  e  lindur më 1964  f/sh me shtetësi Amerikane;  V . B i  lindur më 1972  kosovar dhe ;  V . B i  lindur më 1981 kosovar.

“Si pjesë e këtij operacioni është realizuar edhe një bastisje në Ferizaj ku është arrestuar një person i dyshuar me inicilaet A.Z i  lindur më 1981, i cili dyshohet se është pjesë e këtij grupi kriminal”, njofton Policia e Kosovës, sipas të cilës, edhe në  Shqipëri ka pasur arrestime dhe konfiskim droge.

Sipas Policisë Shqiptare janë konfiskuar; 207 kg. e 360 gr. kanabis sativa; 22 kg  heroinë; 2.8 kgr. Kokainë; 22 bidona nga 25 litra me aceton; 6 armë zjarri

929 fishekë; 143 000 euro; 3  automjete; 25 telefona celular dhe prova të tjera relavante për rastin.