Ka bërë thirrje për dhunë: I vërtetohet dënimi imamit të Winterthurit

Imami me prejardhje nga Somalia kishte apeluar për dhunë kundër atyre që ai i kishte quajtur “myslimanë të këqij”

Gjykata Federale e Zvicrës, si shkalla më e lartë e gjyqësisë në vend, e ka hedhur poshtë ankesën e ish-imamit të xhamisë An`Nur të Winterthurit, njofton sda.chl. Ai ishte dënuar nga Gjykata e Qarkut në Winterthur për veprën penale: Thirrje publike për ushtrim të dhunës.

Në një predikim të të premtes, të bërë në xhaminë në fjalë më 2016, imami me prejardhje nga Somalia kishte apeluar për dhunë kundër atyre që ai i kishte quajtur “myslimanë të këqij”, transmeton albinfo.ch. Gjykata e Qarkut në Winterthur e kishte shpallur atë fajtor dhe i kishte shqiptuar një dënim me burg me kusht.

Veç kësaj, gjykata në fjalë i kishte shqiptuar atij edhe vendimin për dëbim nga Zvicra dhe një ndalesë hyrjeje për dhjetë vjetët e ardhshme.

Imami kishte bërë ankesë në Gjykatën e Lartë (Kantonale) të Cyrihut, ankesë kjo që ishte hedhur poshtë. Së fundi edhe Gjykata Federale, si instanca më e lartë, e ka konfirmuar këtë vendim.

Në ankesën e tij, imami kishte shkruar se thëniet e inkriminuara ishin nxjerrë nga konteksti dhe se përbënin një pjesë të vogël nga predikimi i tij. Po ashtu, sipas tij, aty bëhej fjalë citime të fjalëve të studiuesve islamikë, të Profetit Muhamed dhe të Kuranit, të cilat ai nuk i kishte komentuar.

---