Çifti francez vjedh 40 kg rërë në bregdet

Ata donin ta dërgonin rërën si suvenir për shtëpinë

Një çift francez, të cilët u kapën me 40 kg rërë të vjedhur në ishullin e Sardenjas në makinën e tyre, mund të përballen me një dënim prej 6 vjetësh heqje lirie, përcjell albinfo.ch.

Ata u justifikuan se donin ta çonin në shtëpi rërën si një “suvenir” për të zbukuruar shtëpinë dhe se nuk ishin në dijeni se kjo gjë përbënte një vepër penale.

Çifti francez e kishte futur rërën në 14 shishe plastike në bagazhin e një automjeti tip “SUV” dhe ishin gati ta ngarkonin në një traget që shkonte drejt Toulon, Francë.

Rëra e famshme e Sardenjës konsiderohet si pasuri publike dhe heqja e saj nga ishulli është rreptësisht e ndaluar.

Për vite me radhë, banorët e zonës janë ankuar për vjedhjen e burimeve natyrore, përfshirë rërën.

Sipas një ligji të vitit 2017, tregtimi me rërën dhe guralecët është i paligjshëm dhe zakonisht dënohet me gjobë deri në 3,000 euro.

---