Haradinaj: Do të përballem në gjyq me Edi Ramën

Kryeministri në detyrë i Republikës së Kosovës, Ramush Haradinaj, tha në televizionin T7 se do të përballet në gjyq me kryeministrin e shtetit shqiptar, Edi Rama.

Kjo pasi ky i fundit ka paralajmëruar se do ta padisë për shpifje lidhur me pretendimet e Haradinajt se ai (Rama), presidenti i Kosovës, Hashim Thaçi dhe ai i Serbisë, Aleksandar Vuçiq, kishin planifikuar për të vjedhur 10 miliardë euro pasuri të Kosovës.

“E kam vëlla Edi Ramën. Unë kam qenë kundër ndarjes së Kosovës dhe jam ende, dhe jam kundër të gjitha presioneve që janë bërë ku ka marrë pjesë edhe Edi Rama, edhe Hashim Thaçi. Kjo ndarje do të na sillte dëme të pakthyeshme dhe të gjitha rezervat e Trepçës. Unë do të përballem me të në gjyq, edhe nëse nuk do të jetë më kryeministër, por do të përballem me të”, ka thënë Haradinaj, shkruan kallxo.com, përcjell albinfo.ch.

Po ashtu, Haradinaj ka thënë se nuk ka pasur më asnjë takim me Edi Ramën që nga Samiti i Berlinit.

Kryeministri shqiptar, Edi Rama, tha të enjten në mbrëmje se synon të fillojë veprime juridike kundër kryeministrit të dorëhequr të Kosovës.

---