Verona Gjinaj, drejt titullit kampion në taiboks në Zvicër

"Ndeshja e radhës do të jetë më 16 nëntor. Aty do të luftojë për titullin kampion të Zvicrës“, thotë ajo, duke premtuar se do të arrijë ta fitojë këtë duel

Talentja e taiboksit në Zvicër, shqiptarja Verona Gjinaj, nuk ka të ndalur. Të shtunën e kaluar ajo ka regjistruar edhe një fitore në karrierën e saj. Është kjo fitorja e 4-t e boksieres 15-vjeçare, e cila jeton në Kriens, kantoni Luzern.

„Kam fituar përballë zviceranes Tiffany Wilend. Edhe në prill të këtij viti kemi pasur duel, në të cilën edhe atëherë fitova. Por meqë klubi i saj kërkoi revansh, u përballëm edhe një herë, dhe prapë fitova“, thotë Verona për albinfo.ch.

Për këto suksese të deritashme ajo falënderon trajnerin e saj dhe boksierin e njohur shqiptar, Tefik Bajrami dhe klubin e tij në Luzern. „E falënderoj shumë trajnerin Tefik Bajramin dhe klubin „Bajrami“ në Luzern. Natyrisht falënderoj edhe prindërit dhe gjithë familjen time për përkrahjen që ma japin për të vazhduar me suksese të tjera“, shprehet Verona.

Pas kësaj fitore, Veronës i janë hapur rrugët për të zhvilluar ndeshje për titullin kampion në taiboks të Zvicrës.

„Do të vazhdoj me ushtrime intensive. Ndeshja e radhës do të jetë më 16 nëntor. Aty do të luftoj për titullin kampion të Zvicrës“, përgjigjet ajo duke premtuar se do të arrijë ta fitojë edhe këtë duel, i cili do të jetë sigurisht më i vështiri në karrierën e saj të deritashme.

Verona është nxënëse e shkollës së mesme në Kriens, Luzern, ndërsa është me prejardhje nga komuna e Gjakovës. Ajo flet disa gjuhë: shqip, gjermanisht, anglisht, kroatisht dhe pakëz spanjisht.

---