Nesër, deri në një metër e gjysmë borë në Alpet jugore të Zvicrës

Në Tiçino dhe në Valisin e Epërm niveli i rrezikut, i përcaktuar nga autoritetet, është ngritur në shkallën 4, që nënkupton se ekziston rreziku akut nga ortiqet

Në Alpet zvicerane, në ato jugore, janë shënuar këto ditë reshje të konsiderueshme të borës. Por sipas qendrës meteorologjike Meteonews, të dielën priten reshje edhe më të mëdha, shkruan 20minuten.ch.

Në veçanti kjo ka të bëjë me pjesën e Valisit të epërm (Oberwallis), Tiçinon dhe zonën rreth Simplon-it, transmeton albinfo.ch. Madje sipas Roger Perrot nga Meteonews, pritet që bora e re që do të bjerë të dielën të arrijë trashësinë deri në 1 metër e gjysmë.

Si pasojë e reshjeve të mëdha të borës, në Alpet Jugore pritet të rritet edhe rreziku nga ortiqet e borës. Për këtë arsye në Tiçino dhe në Valisin e Epërm niveli i rrezikut, i përcaktuar nga autoritetet, është ngritur në shkallën 4, që nënkupton se ekziston rreziku akut nga ortiqet.

Ndërkohë, në anën veriore të Apleve kanë munguar reshjet në tërësi, përcjell albinfo.ch. Sipas Perret, në lindje të vendit mbretërojnë temperatura të buta prej rreth 10 gradësh, me re dhe diell, që nesër pritet të rriten edhe më shumë. Ai thotë se ky mot nuk është i përshtatshëm për sportet dimërore, në asnjërën pjesë të Zvicrës. Kjo për shkak të erërave të forta që priten të fryjnë në male.

---