Mediat zvicerane ndjekin minutë pas minute situatën pas tërmetit në Shqipëri

Fotografitë nga tërmeti nuk zbresin nga ballina ndërkohë që me "newsticker" ndiqet situata në Shqipëri minutë pas minute

Mediat e gjithë botës po i kushtojnë hapësirë të madhe tërmetit të fuqishëm që goditi sot Shqipërinë.  Ato merren intensivisht me pasojat e kësaj fatkeqësie natyrore të përmasave të mëdha.

Ajo që bie në sy është hapësira që tërmetit në Shqipëri po i japin mediat në gjuhën gjermane dhe në veçanti ato të Zvicrës, shkruan albinfo.ch.

Portali i gazetës  zvicerane “20minuten” që nga mëngjesi ka rezervuar ballinën ose faqen e parë për lajmet që vijnë nga zonat e tërmetit. Fotografitë nga tërmeti nuk zbresin nga ballina, ndërkohë që me “newsticker” ndiqet situata në Shqipëri minutë pas minute.

Ngjashëm, në ballinën e saj të lajmeve ndërkombëtare e ka vendosur edhe portali i radiotelevizionit publik zviceran SRF lajmin me ilustrime nga pasojat e tërmetit, shkruan albinfo.ch. Edhe ky portal bën freskimin e lajmeve në kohë reale.

Po ashtu, me “newsticker” po e përcjell gjendjen në Shqipëri edhe portali i gazetës tjetër, Blick.

Krahas lajmeve që rifreskohen në vazhdimësi, këto media japin edhe rrëfime nga njerëzit që kanë përjetuar tërmetin në Shqipëri. Bëhet fjalë për turistë nga Zvicra (me origjinë shqiptare dhe të tjerë), të cilët kanë qëlluar mbrëmë dhe sot në Durrës ose në zonat e tjera të goditura nga tërmeti.

 

---