“Airbus” përzgjidhet për fluturimin më të gjatë në botë

Airbus dhe Boeing ofruan aeroplanët e tyre në Qantas disa muaj më parë

Linja ajrore australiane Qantas ka zgjedhur Airbus, në vend të Boeing, si partner për fluturimin më të gjatë në botë me udhëtarë.

Sipas disa mediave, kjo është një goditje tjetër për Boeing, një prodhues amerikan që është në telashe për shkak të krizës pas rrëzimit të dy aeroplanëve 737 MAX.

Qantas ka thënë se do të përdorë aeroplanët Airbus për projektin e paralajmëruar gjatë verës, i cili përfshin fluturime të planifikuara pa ndalesë nga Sidnei, Melburni dhe Brisbane për në Londër dhe Nju-Jork.

Këto do të jenë linjat ajrore komerciale më të gjata në histori.

Linja ajrore australiane tha të premten që nuk ka porositur ende avionë Airbus, por do të punojë me një konsorcium evropian për të prodhuar aeroplan pasagjerësh në një kontratë për t’u furnizuar deri me 12 avionë.

Airbus dhe Boeing ofruan aeroplanët e tyre në Qantas disa muaj më parë.

Drejtori i Përgjithshëm i Qantas, Alan Joyce tha se kjo ishte një zgjedhje e vështirë dhe se të dy prodhuesit po punonin për inovacione për të përmirësuar më tej avionin.

Airbus do të shtojë një rezervuar tjetër karburanti në modelin A350, të zgjedhur për projektin e fluturimit të tejgjatë, si dhe do të rrisë pak peshën maksimale të ngritjes për të arritur performancën e dëshiruar në linjën e re.

---