Të vdekurit në Prizren janë burrë e grua

Të mërkurën, dy persona janë gjetur pa shenja jete në një shtëpi në lagjen “Ortakoll” të komunës së Prizrenit.

Këtë e ka konfirmuar për lajmi.net Rreshteri i Policisë së Rajonit të Prizrenit, Vesel Gashi.

Gashi ka bërë të ditur se ende nuk dihen motivet dhe asgjë, mirëpo e vetmja që dihet është se personat e vdekur janë burrë dhe grua, përcjell albinfo.ch.

“Ende jemi duke pritur që të përfundojë shikimi i vendit të ngjarjes dhe më pas do t’ju njoftojmë. Ajo se çka dihet deri më tani është se janë gjetur dy trupa të pajetë, vdekjen e tyre e ka konstatuar ekipi i mjekësisë urgjente në Prizren. Në vendin e ngjarjes janë hetuesit rajonalë së bashku me hetuesit e Institutit të Mjekësisë Ligjore, duke bërë ekzaminimin e vendit të ngjarjes. Në lidhje me detaje do të dalim pasi që të kryhen këtyre hetimeve. Ajo çka dihet deri më tani dhe që mund t’ju konfirmojë është se viktimat janë bashkëshortë, pra burrë dhe grua”, ka thënë Gashi për lajmi.net, duke mos dhënë detaje të tjera shtesë.