Kantoni Tiçino shpall gjendjen emergjente për shkak të koronavirusit

Veç tjerash, do të mbyllen të gjitha shkollat, publike dhe private të cilat ofrojnë mësim të detyruar

Qeveria e Kantonit të Tiçinos, më të prekurit nga koronavirusi, ka shpallur sot gjendjen e emergjencës, e cila do të zgjasë deri më 29 mars. Këtë njoftim, ekzekutivi i  kantonit jugor të Zvicrës e ka bërë në mbrëmjen e të mërkurës, shkruan sda.ch.

Bazuar në këtë vendim, jeta publike në kanton do të pësojë kufizime tüë theksuara, transmeton albinfo.ch. Kështu, veç tjerash, do të mbyllen të gjitha shkollat, publike dhe private të cilat ofrojnë mësim të detyruar.

Veç kësaj, që nga mesnata e sontme do të jenë të mbyllura të gjitha kinematë, teatrot, pishinat, diskotekat, qendrat sportive dhe të ngjashme.

Ndërkaq, edhe pas shpalljes së gjendjes së emergjencës, vazhdojnë të jenë të lejuara aktivitetet sportive te të cilat mund të mbahet distanca e lejuar mes dy personave.

 

 

---