AKR nuk do të jetë pjesë e qeverisë së re

Aleanca Kosova e Re e Behgjet Pacollit nuk do të jetë pjesë e qeverisë së re, e cila pritet të formohet nga Lidhja Demokratike e Kosovës. Pjesë e së cilës pritet të jetën edhe AAK, Nisma dhe subjektet politike të komuniteteve pakicë.

Pra, pjesë e kësaj qeverie nuk do të jetë AKR-ja. Kështu ka thënë për lajmi.net kreu i kësaj partie, Behgjet Pacolli.

Ai ka thënë se nuk janë të interesuar të jenë pjesë e asnjë qeverie.

“Po, e vërtetë, nuk jemi të interesuar të jemi pjesë e asnjë qeverie”, ka thënë shkurt Pacolli për Lajmi.net.

Ndryshe, Lidhja Demokratike e Kosovës është shprehur e gatshme për formimin e Qeverisë së re. Madje presidenti Hashim Thaçi edhe zyrtarisht i ka kërkuar Mustafës emrin e mandatarit për formimin e Qeverisë. LDK ka marrë vendim që Avdullah Hoti të jetë kandidat i kësaj partie për kryeministër.

Kreu i LDK-së, Isa Mustafa, ka deklaruar se ai pret që mbase javën e ardhshme koalicioni mund të jetë gati dhe të kërkojë votat e miratimit në Kuvendin e Kosovës.

Për miratimin e qeverisë në Kuvend kërkohen të paktën 61 vota të deputetëve.

LDK-ja ka 28 deputetë. Por, 4 prej tyre, edhe sipas deklaratave të vetë zyrtarëve të LDK-së, mbeten në pikëpyetje nëse do ta mbështesin qeverinë e re, ku bën pjesë edhe kryetarja e Kuvendit, Vjosa Osmani.

AAK-ja ka 13 deputetë, Lista Serbe 10, Nisma Socialdemokrate 4 dhe Aleanca Kosova e Re 2 deputetë.

Kujtojmë se LDK-ja inicioi mocion mosbesimi kundër Qeverisë së drejtuar nga Lëvizja Vetëvendosje (LVV), 44 ditë pas bashkëqeverisjes me të.

---