Koronavirus: Rreth 14 mijë persona të shëruar në Austri, në trajtim edhe 1.262

Në 24 orët e fundit në Austri, kishte tre persona të tjerë të vdekur. 72 persona gjenden ende në intensivë.

Në Austri nga e shtuna deri të dielën janë diagnostikuar edhe 38 persona të tjerë me koronavirus, 16 prej tyre janë nga Vjena. Sipas Ministrisë së Brendshme, numri i përgjithshëm i të infektuarve (deri të dielën në mëngjes) ishte 15.871 persona. Nga këta, 1.262 janë duke u trajtuar, shkruan oe24, përcjell Albinfo Austria.

Numri i të vdekurve nga koronavirusi bashkë me tri të fundit, kap shifrën e 618 personave.

Tri rastet e vdekjeve të fundit ishin një grua dhe një burrë nga Vjena si dhe një grua tjetër nga Steiermark.

Sipas Ministrisë së Shëndetësisë, deri më tash janë kryer gjithsej 316.508 teste për koronavirus.

Siç raporton “oe24.at” 291 persona janë ende në trajtim spitalor, 18 më pak se një ditë më herët. 72 pacientë gjendën në klinikë intensive, çka do të thotë se në krahasim me 24 orë me parë, është një rënie e numrit prej shtatë personave. Prej koronavirusit deri më tash janë shëruar 14.000 pacientë, apo saktësisht 13.991, më këtë kuptohet se 63 persona janë shëruar më shumë se ditën e shtunë.

---