Kosovë, eksporti për BE e SHBA shënoi ngritje për 45 për qind

Duket se pandemia nuk ka pasur vetëm efekt negativ ekonomik në Kosovë, përkundrazi, sipas të dhënave të Doganës së Kosovës, në periudhën tremujore të këtij viti (2021), eksporti i kompanive kosovare në vendet e BE- së dhe SHBA-së, ka pasur rritje për 45 për qind, transmeton albinfo.ch.

Ani pse pandemia ka pasur ndikim të keq në mbylljen e shumë kompanive në Kosovë, duke numëruar deri në 800 kompani të mbyllura, sa i përket eksportit, Kosova ka shënuar rritje si asnjëherë më parë.

Eksporti i mallrave të ndryshme, kryesisht atyre nga druri, kanë shënuar rritje. Në periudhën 3-mujore të këtij viti, eksporti i kompanive kosovare në vendet e Bashkimit Evropian dhe atyre të Shteteve të Bashkuara, ka shkuar në rritje deri në 45%, transmeton tutje albinfo.ch.

Adriatik Stavileci, zëdhënësi i Doganës së Kosovës është shprehur se në tremujorin e fundit Kosova ka shënuar rritje të eksportit në vlerë mbi 50 milionë euro më shumë se sa tremujori i vitit të kaluar.

“Vlera e saktë e vitit të kaluar në tremujorin e parë ishte 87 milionë euro, ndërsa në këtë tremujor janë 126 milionë euro mallra të eksportuara, e cila është një nga lajmet më të mira për ekonominë kosovare”, tha ai gjatë një interviste.

Sipas tij, nëse vazhdon ky trend i eksportit për produktet vendore deri në fund të vitit, atëherë shifra e eksportit do të kaloj në 600 milionë euro. /Albinfo.ch