Kosova

Albin Kurti: Donika Gërvalla e mbron dhe e afirmon UÇK-në

E mërkurë, 5 Maj 2021 - 17:45 albinfo.ch

(AP Photo/ Visar Kryeziu)

Kryeministri Albin Kurti i ka dalë në mbrojtje ministres së Punëve të Jashtme, Donika Gërvalla, pas deklaratave të saj kundër ish-krerëve të UÇK-së.

Kurti ka shkruar se Gërvalla mbron dhe e afirmon luftën tonë çlirimtare dhe UÇK-në.

Mirëpo, sipas tij, fushata kundër zëvendëses së tij po bëhet kur Gërvalla shkoi në listën e Lëvizjes Vetëvendosje.

Shkrimi i plotë i Kurtit:

Dje, duket që filloi një fushatë kundër zëvendëses sime dhe ministres së MPJD, znj. Donika Gërvalla, me tezën se ajo nuk e respekton UÇK-në. Është interesante qysh kjo fushatë nuk nisi kur znj. Gërvalla erdhi në listën tonë zgjedhore e as kur u emërua ministre, por tash që u kthye nga vizita e suksesshme në Bruksel.

Znj. Gërvalla e mbron dhe e afirmon luftën tonë çlirimtare dhe UÇK-në. Në takimet me ndërkombëtarë, ajo e shpjegon agresionin dhe krimet e Serbisë gjatë luftës në Kosovë si pak kush tjetër.