Rriten shkëmbimet tregtare mes Shqipërisë dhe Austrisë

Austria gjatë viteve të fundit renditet në vendet kryesuese të listës së investimeve të huaja në Shqipëri

Mësohet se Shqipëria rriti ndjeshëm eksportet drejt Austrisë gjatë gjysmës së parë të këtij viti. Sipas raportit mbi tregtinë e jashtme të publikuar së fundmi nga INSTAT-i, eksportet shqiptare arritën 1.1 miliard lekë gjatë periudhës janar-qershor, nga 767 milionë lekë që ishin në gjysmën e parë të 2020-ës. Ndërkohë rritje shënuan edhe importet nga Austria. Sipas INSTAT-it, importet llogariten 3.1 miliardë lekë për periudhën, nga 2.3 miliardë lekë që ishin përgjatë 6-mujorit të parë të 2020-ës, përcjell albinfo.at.

Nga ana tjetër, marrëdhëniet ekonomike ndërmjet Shqipërisë dhe Austrisë janë intensifikuar dukshëm gjatë viteve të fundit. Veçanërisht sistemi bankar dhe ai i sigurimeve (rreth 70% të aksioneve në treg) dominohen aktualisht nga biznese austriake.

Me vënien në funksion të hidrocentralit ASHTA në veri të Shqipërisë, Austria përfaqësohet në Shqipëri edhe në fushën e energjetikës.

Austria gjatë viteve të fundit renditet në vendet kryesuese të listës së investimeve të huaja në Shqipëri. Aktualisht shuma e investimeve austriake në Shqipëri llogaritet rreth 554 milionë eurosh. Në Shqipëri operojnë gjithsej 100 ndërmarrje me kapital austriak (përfshirë edhe ndërmarrjet me kapital të përbashkët). Gjithashtu edhe në fushën e turizmit ka një potencial të madh zhvillimi. Numri i turistëve austriakë që vizitojnë çdo vit Shqipërinë po rritet gjithmonë e më shumë. /Albinfo.ch

 

 

---