Shteti që po përgatitet për dozën e katërt kundër Covid-19

Derisa shumë shtete po diskutojnë për dozimin e tretë me vaksina COVID-19, autoritetet izraelite po shqyrtojnë mundësinë e një doze të katërt.

Izraeli po sigurohet që ka furnizim të mjaftueshëm me vaksina, në rast se nevojitet një raund i katërt inokulimesh.

Kjo, sipas zyrtarit më të lartë shëndetësor të vendit.

“Ne nuk e dimë se kur do të ndodhë. Shpresoj shumë që nuk do të jetë brenda gjashtë muajsh dhe se doza e tretë do të zgjasë më gjatë”, tha drejtori i Përgjithshëm i Ministrisë së Shëndetësisë, Nachman Ash, në një intervistë për Radio 103FM.

Izraeli, i cili ka përdorur kryesisht vaksinën Pfizer, deri më tani ka vaksinuar rreth 2.8 milionë njerëz me dozën e tretë.

Zyrtarët shëndetësorë izraelitë mbrojnë tezën e një doze përforcuese. Sipas tyre, efektet e dozave fillestare dobësohen pesë muaj pas vaksinimit.

Shtetet e Bashkuara dhe Britania e Madhe po ashtu po planifikojnë inokulimin e dozave përforcuese.

Evropa po merr në konsideratë edhe dozimin e tretë.

 

---