Hyrja e shtetasve shqiptarë dhe të huaj në territorin e Shqipërisë shënon rritje

Ilustrim

Mësohet se hyrja e shtetasve shqiptarë dhe të huaj në territorin shqiptar ka pësuar rritje me 2.6 herë më shumë në gushtin e vitit 2021, duke e krahasuar me atë të një viti më parë.

Këto janë përfundime të nxjerra nga publikimi  i Institutit të Statistikave (INSTAT).

Gjatë muajit gusht në Shqipëri kanë hyrë 1 milion e 537 mijë e 191 shtetas, ndërsa në gusht të 2020-ës kjo shifër ka qenë 575 mijë e 559 persona. Pra këtë vit rritja është me 2.7 herë.

Peshën me të madhe në këtë shifër e ka zënë shteti i Kosovës, ndërsa më të ultën Spanja.

Për sa u përket daljeve të shtetasve të huaj, shifra këtë vit arrit në 1 milion e 476 mijë e 830 persona, ndërsa një vit më parë kishte dyfish më pak.

Ndërsa për sa u përket shtetasve vendas, më 2021 lëvizja e tyre ka qenë dyfish më e lartë për sa u përket daljeve dhe trefish më lartë në shifrat e hyrjeve.

Treguesi i lëvizjes së shtetasve është matur dhe në një periudhë më të zgjatur, bazuar në shifra të tetë mujorit të vitit 2020 dhe 2021.

Numri i shtetasve të huaj të hyrë në Shqipëri gjatë tetë mujorit të 2021, ishte 4 milionë e 384 mijë e 72, duke u rritur me 2.5 herë, në krahasim me të njëjtën periudhë të vitit 2020.

Gjatë kësaj periudhe, Shtetet e Bashkuara të Amerikës janë kryesuese duke pasur rritjen më të lartë pasuar nga Polonia. Ndërsa, lidhur me shtetin që ka pësuar uljen më të ndjeshme , krahasuar me të njëjtën periudhë të vitit 2020 është Greqia.

Arsyet e lëvizjeve janë të ndryshme, ku pushimet zënë peshën kryesore në numra, pasuar nga udhëtarët transitë.

Lidhur me mënyrën e hyrjes në territor ose daljen, transporti nga toka është më i larti.