Synohet thellimi i bashkëpunimit mes Kantonit Schwyz dhe institucioneve të Kosovës

Në vazhdën e vizitave zyrtare të kantoneve të Konfederatës së Zvicrës dhe me qëllimin e thellimit dhe zgjerimit të bashkëpunimit në fushat e interesit të përbashkët me institucionet e Republikës së Kosovës, Udhëheqësi i Konsullatës së Republikës së Kosovës në Cyrih, Sami Kastrati, së bashku me Këshilltaren Shukrije Ramadani i kanë bërë një vizitë zyrtare Kantonit të Schwyz-it.

Në kuadër të kësaj vizite, përfaqësuesit diplomatikë të Republikës së Kosovës janë pritur nga përfaqësuesi i Qeverisë Kantonale, André Rüegsegger dhe Udhëheqësi i Departamentit për Çështje Ekonomike, Andreas Barraud, shkruan albinfo.ch.

Shqyrtimi i mundësive për rritjen e bashkëpunimit në fushën ekonomike, atë të edukimit e kulturës; binjakëzimi eventual në mes të qyteteve të këtij Kantoni dhe atyre nga Kosova, si dhe integrimi i komunitetit shqiptar nga Kosova në jetën shoqërore e institucionale, ishin disa nga temat e diskutimit.

“Ishte vërtet një mikpritje e jashtëzakonshme dhe një takim shumë i ngrohtë e miqësor në Kantonin e Schwyz-it. Na gëzoi fakti që të dëgjojmë fjalët dhe vlerësimet më të mira për komunitetin e shqiptarëve të Kosovës që jetojnë në këtë Kanton dhe integrimin e tyre, që tashmë po prodhon storie suksesi gjithandej dhe në shumë lëmi. Presim që bashkëpunimi i nisur të rezultojë me projekte konkrete që do të ishin në interesin e të dyja vendeve dhe dy popujve”, ka thënë diplomati Kastrati.

Në Kantonin Schwyz llogaritet se jetojnë mijëra shqiptarë nga Kosova.