Maqedonia e Veriut regjistron mbi dy mijë raste të reja me Covid-19

KEYSTONE/EPA/GEORGI LICOVSKI

Ministria e Shëndetësisë në Maqedoninë e Veriut ka njoftuar se gjatë 24 orëve të fundit, nga 6 mijë e 10 teste të kryera, janë regjistruar 2 mijë e 71 raste të reja me virusin korona. 1 mijë e 47 raste janë regjistruar vetëm në Shkup. Nga MSH shtojnë se 275 raste paraqesin riinfektime. Autoritetet shëndetësore njoftojnë se janë regjistruar edhe 1.450 pacientë të shëruar.

Si pasojë e komplikimeve nga Covid-19, brenda 24 orëve janë regjistruar 9 viktima. Ndërkaq, nga MSH njoftojnë se 2 pacientë të tjerë që kanë ndërruar jetë në periudhën 5.01.2022 – 20.01.2022 janë regjistruar në raportin e sotëm për Covid-19.

Që nga fillimi i pandemisë, në Maqedoninë e Veriut janë regjistruar gjithsej 252 mijë e 947 raste, prej të cilëve 225 mijë e 56 janë shëruar, kurse 8 mijë e 177 kanë ndërruar jetë. Maqedonia e Veriut aktualisht numëron 19 mijë e 714 raste aktive me koronavirus.