Kosovë: Cilat masa pritet të hiqen nesër?

Nesër pritet që Qeveria e Kosovës të publikoj masat e reja anti-Covid.

Shoqata e Gastronomëve të Kosovës ka takuar pasditen e sotme zëvendësministrin e Shëndetësisë, Arsim Berisha, me të cilin kanë diskutuar rreth masave të reja që pritet të vendosen nesër.

Mësohet se nga ky takim është diskutuar zgjatja e orës për restorante e kafiteri, ku pritet që të zgjaten deri në orën 23:00, po ashtu edhe heqja e orës policore dhe lirimi i ahengjeve e klubeve të natës.

Arian Veanica nga Shoqata e Gastronomëve tha për Insajderin se kanë kërkuar masat e cekura më lart, ku sipas tij, pritet që të merret vendim nesër për to.

“Ishim në takim me zv. ministrin. Kërkuam lirimin e ahengjeve, klubeve dhe funksionimi i kafe bar restoranteve sipas rregulloreve komunale, si dhe të hiqet ora policore. Një pjesë do të aprovohen, po të shohim se çka vendoset më sigurt”, tha ai.

Në takim me përfaqësues të shoqatës ishin edhe shefi i kabinetit, Kujtim Salihu, dhe këshilltarja politike, Lumturie Beka.

---