Shqipëri: Rritet importi i veturave elektrike

@pixabay

Shqipëria ka qenë ndër vendet e para në rajon, e cila ka hequr pagesat doganore për import të veturave elektrike. E ky vendim ka ndikuar që në vend të ketë numër të lartë të importimit të këtyre veturave, transmeton Albinfo.ch.

Drejtoria e Përgjithshme e Doganave Shqiptare, në zbatim të direktivave europiane, ka qenë e para ndër administratat doganore të rajonit që ka përqafuar qasjen ambientaliste lidhur me lehtësitë fiskale për autoveturat e reja elektrike.

Në një njoftimin për media ata bëjnë të ditur se që në vitin 2020 është hequr pagesa e Tatimit mbi Vlerën e Shtuar (TVSH) në doganë për importin e autoveturave elektrike të reja.

Duke iu referuar statistikave të viteve të fundit të importeve, vërehet një rritje e trendit të importit dhe kërkesës.

Megjithëse viti 2020 ishte një vit pandemik, sërish janë importuar rreth 215 autovetura elektrike të reja, 309 në 2021 dhe pritet që për 2022 ky numër të kalojë mbi 500.