Trend rritës i inflacionit në Gjermani

Çmimet për mallrat në nivele të larta

Inflacioni në Gjermani u rrit në mars në një nivel rekord që nga ribashkimi në vitin 1990, treguan shifrat zyrtare të publikuara të mërkurën, pasi lufta në Ukrainë bëri që çmimet e energjisë të rriteshin, njofton albinfo.ch.

Çmimet e konsumit u rritën me 7.3 për qind në vit, sipas agjencisë federale të statistikave Destatis, nga 5.1 për qind në shkurt.

Pushtimi i Rusisë ndaj fqinjit të saj kishte çuar në rritje çmimet e naftës dhe gazit dhe kishte “një ndikim të konsiderueshëm në shkallën e lartë të inflacionit”, tha Destatis, në një deklaratë.

Hera e fundit që një normë kaq e lartë u regjistrua ishte në vjeshtën e vitit 1981 në Gjermaninë Perëndimore, kur çmimet e naftës u rritën “drastikisht” si pasojë e luftës Iran-Irak, tha agjencia.

Ashtu si shumë nga fqinjët e saj në Evropë, Gjermania është shumë e varur nga furnizimet me naftë dhe gaz rus për të fuqizuar industrinë e saj dhe për të ngrohur shtëpitë e saj.

Gjermania ka kundërshtuar thirrjet për një embargo të BE-së ndaj karburanteve fosile ruse, por nga frika se dërgesat mund të kufizohen, kjo ka çuar çmimet për mallra në nivele të larta. /Albinfo.ch.

---