OBSH: Nuk ka nevojë për vaksinime masive kundër lisë së majmunit

EPA/NARONG SANGNAK

Një zyrtare e lartë e Organizatës Botërore të Shëndetësisë (OBSH) ka thënë se nuk ka nevojë për vaksinime masive kundër virusit të lisë së majmunit që aktualisht ka prekur disa pjesë të botës, shkruan AA, përcjell albinfo.ch

Sylvie Briand, drejtoresha e Përgatitjes dhe Parandalimit ndaj Epidemive dhe Pandemive në OBSH, iu drejtua konferencës së posaçme për vendet anëtare të organizatës në Asamblenë e 75-të Botërore të Shëndetësisë mbi “Shpërthimin e lisë së majmunit në shumë vende”.

“Kjo është një sëmundje zoonotike, që do të thotë se transmetohet nga kafshët. Por për fat të keq, ne nuk e dimë ende se cili është rezervuari i kafshëve për këtë virus”, ka thënë ajo.

Briand theksoi se sëmundja është endemike në më shumë se nëntë vende në Afrikë, ku ka pasur shpërthime në vitet e fundit.

“Ne jemi këshilluar deri më tani se nuk ka nevojë për vaksinim masiv dhe nuk ka nevojë për fushata të mëdha imunizimi”, shtoi ajo.
Ajo vuri në dukje se rreth 200 raste janë raportuar deri më tani në të gjithë botën dhe u shpreh se numri mund të rritet në ditët në vijim pasi ky është “vetëm fillimi i kësaj ngjarjeje”.

“Ne nuk rekomandojmë ndalime apo kufizime të udhëtimit dhe duhet të vazhdojmë të komunikojmë për atë që dimë se çfarë po bëhet dhe të sigurojmë vërtet publikun. Çështja është se ne duhet vetëm të marrim masat e duhura”, shtoi zyrtarja e OBSH-së, përcjell tutje albinfo.ch