SHBA-ja dhe Danimarka i dërgojnë Ukrainës raketa kundër anijeve

Keystone

Ministri ukrainas i Mbrojtjes, Oleksiy Reznikov, deklaroi se Shtetet e Bashkuara të Amerikës dhe Danimarka kanë dërguar në Ukrainë raketa kundër anijeve, (Harpoon).

“Mbrojtja detare e shtetit tonë do të forcohet nga raketat Harpoon, ato do të përdoren nga ekipet e trajnuara ukrainase”, tha ai këtë të shtunë.

Sipas tij, këto raketa do të përdoren përkrah raketave ukrainase Neptun, për të mbrojtur Detin e Zi, përfshirë edhe qytetin Odesa.

Reznikov u shpreh se Ukraina ka marrë edhe dërgesa të artilerisë së rëndë, përfshirë edhe një model të modifikuar amerikan të obusëve M109, që do të lejojë ushtrinë ukrainase të godasë objektiva nga distanca më të largëta.

Më herët gjatë ditës së djeshme, Presidenti i Rusisë, Vladimir Putin, ka zhvilluar një bisedë telefonike me homologun francez, Emmanuel Macron dhe kancelarin gjerman, Olaf Scholz.

Putin u tha të dy liderëve se furnizimi me armë për Ukrainën ishte i rrezikshëm, duke paralajmëruar për rreziqet e destabilizimit të mëtejshëm të situatës dhe përkeqësimit të krizës humanitare./Reuters