BE-ja, drejt sigurisë më të madhe kibernetike

Komisioni Evropian prezantoi sot në Bruksel një projektligj që synon t’i bëjë produktet dixhitale më të sigurta dhe të pajisura me elementë kundër sulmeve të mundshme kibernetike.

“Bazuar në të ashtuquajturin “Akti i Rezistencës Kibernetike”, prodhuesit e produkteve me elementë dixhitalë të shitur në Bashkimin Evropian do të duhet të sigurohen që mallrat e tyre të jenë në përputhje me kërkesat e reja të detyrueshme të sigurisë”, sipas një njoftimi për shtyp të Komisionit Evropian.

“Kur bëhet fjalë për sigurinë kibernetike, Evropa është po aq e fortë sa hallka e saj më e dobët”, tha në deklaratë komisioneri i Tregut të Brendshëm të BE-së, Thierry Breton.

“Kompjuterët, telefonat, pajisjet shtëpiake, pajisjet ndihmëse virtuale, makinat, lodrat… secili prej këtyre qindra milionë produkteve mund të shërbejnë si një pikë e mundshme hyrëse për një sulm kibernetik”, tha Breton.

“Shkeljet e të dhënave në BE u kushtojnë bizneseve dhe qytetarëve të paktën 10 miliardë euro (10 miliardë dollarë) në vit dhe dëmi i shkaktuar nga përpjekjet keqdashëse për të ndërprerë trafikun në internet arrin në 65 miliardë euro në vit”, sipas shifrave të BE-së.

Propozimi do të shqyrtohet dhe mund të bëhen ndryshime nga vendet e BE-së dhe Parlamenti Evropian, përpara miratimit të tij.