Ambasada Zvicerane i dorëzon Qeverisë së Kosovës platformën për punësimin e të rinjve

“SUPER PUNA” platforma si donacion i Agjencisë Zvicerane

Si rezultat i bashkëpunimit të përbashkët mes Zvicrës dhe Ministrisë së Financave, Punës dhe Transfereve, është themeluar portali i punës “SUPER PUNA”, shkruan albinfio.ch.

Kjo platformë e re ka për qëllim mbështetjen e të rinjve që kërkojnë punësim dhe forcimin e lidhjeve me sektorin privat.

Në kuadër të bashkëpunimit të suksesshëm në mes të Qeverisë së Republikës së Kosovës dhe Qeverisë Zvicarane është zhvilluar platforma për punësimin e garantuar për të rinj.

Kjo platformë është donacion i Agjencisë Zvicerane për Zhvillim dhe Bashkëpunim dhe projektit EYE për Ministrinë e Financave, Punës dhe Transfereve. Për këtë qëllim, Ministri Hekuran Murati priti në takim përfaqësuesin e Ambasadës Zvicerane z. Christophe Favre dhe përfaqësuesit e projektit EYE, për të parë bashkërisht prezantim e platformës së punësimit.

Gjatë takimit, Ministri Murati theksoi se punësimi është prioritet kyç i Qeverisë, e këtë po e dëshmojmë përmes politikave që në qendër kanë punësimin e qëndrueshëm për të gjitha kategoritë.

Në anën e tij, z. Christophe Favre u shpreh entuziast për projektin në fjalë, dhe konfirmoi edhe njëherë mbështetjen e Qeverisë zvicerane për nisma të tilla që synojnë zhvillimin ekonomik e ngritjen e mirëqenies sociale.

Platforma për skemën e punësimit të garantuar për të rinj do të lancohet së shpejti nga Ministria e Financave, Punës dhe Transfereve.

---