Reuters: Kosova s’ka helikopterë, i kërkon NATO-s të transportojë serbin e arrestuar

Deklarata e djeshme e ministrit të Brendshëm, Xhelal Sveçla, se kanë dorëzuar kërkesë te ndërkombëtarët për transferimin e ish-policit Dejan Pantiq në qendrën adekuate për mbajtje të paraburgimit, është bërë lajm në mediat ndërkombëtare.

Agjencia e Lajmeve Reuters shkruan se Kosova u ka kërkuar trupave të NATO-s që të transportojnë ish-policin serb, i cili u arrestua dy javë më parë, por nuk mund të transferohej diku tjetër, sepse serbët vendas që kërkonin lirimin e tij ngritën barrikada për të parandaluar zhvendosjen e tij. Reuters ka transmetuar deklaratën e Sveçlës nga konferenca e djeshme për shtyp në Mitrovicë. “Ai (Pantiq) duhet të jetë në qendrën e paraburgimit dhe jo në stacion policor dhe për këtë kemi kërkuar nga partnerët tanë ndërkombëtarë që ta transferojnë në një objekt adekuat”, tha ministri i Brendshëm, Xhelal Sveçla. Reuters tutje potencon se misioni i NATO-s në Kosovë, KFOR, është e vetmja forcë që ka helikopterë dhe se Kosova nuk posedon një të tillë, dhe se i nevojitet leja e NATO-s për të marrë një të tillë.