Rekord absolut: Ofron 826 mijë franga për dy targa të makinës

Në një ankand targash, një ofertues i panjohur ka ofruar shumën rekord prej 826 mijë frangash për dy targat “BL 49” dhe “BL 850”. Konsiderohet të jetë serioz

Ende nuk është punë e kryer por megjithatë, në kantonin e Baselland-it, dikush është i gatshëm të paguajë një shumë “stratosferike” për dy targa. Nëse i paguan, kjo shumë do të ishte katërfish më e lartë se rekordi i deritashëm zviceran.

Në Krishtlindje, një ankand për “BL 49” dhe “BL 850” ka përfunduar me një ofertë rekord prej gjithsej 826,000 frangash për të dyja targat, transmeton albinfo.ch. Asnjëherë nuk është ofruar më shumë për një targë.

Por a mund të jetë kjo një shaka? Në fund të fundit, numrat 49 dhe 850 nuk janë më të veçantët deri tani. Për personin me pseudonimin “UeliMueli44”, megjithatë, duket se ato kanë vlerën më të madhe, shkruan 20minuten.ch. Por, a mund të paguajë edhe personi që qëndron pas këtij pseudonimi?

“Personi është i njohur për ne dhe tashmë ka paguar targa, në raste të tjera. Gjithçka deri tani e ka paguar gjithmonë”, thotë Pascal Donati, shef i inspektimit të mjeteve motorike në Baselland. Natyrisht, ai nuk e tregon emrin e personit.

Sidoqoftë, shuma e ofruar nuk ishte marrë deri të martën. Personi i zotuar tani ka 30 ditë për të transferuar paratë. Nëse pagesa nuk bëhet në kohë, departamenti i inspektimit të automjeteve motorike mund t`i kërkojë “UeliMueli44” të paguajë një tarifë kompensimi prej 250 frangash.

Pavarësisht nëse vendimi për të paguar shuma kaq të mëdha duket i çuditshëm ose megaloman për shumicën, shteti është i kënaqur që individët të caktuar duan të paguajnë një pasuri të tërë për targat e tyre, përcjell albinfo.ch. Nëse realisht transferohen 826,000 franga, e gjithë shuma do të derdhet në arkat e kantonit.

(Foto: Facebook Kanton Basel-Landschaft)

---