Serbia pretendon se e ka “çnjohjen e dhjetë të Kosovës në sirtar”

Daçiq: “E kemi edhe shtetin e 10-të, i cili ka tërhequr njohjen e Kosovës”

Serbia pretendon se në “sirtar” e ka siguruar edhe “çnjohjen e dhjetë” të shtetit të Kosovës, ka thënë Ministria e Punëve të Jashtme e Serbisë, e cila udhëhiqet nga Ivica Daçiç, përcjell albinfo.ch.

Kjo e ashtuquajtur “listë çnjohjesh”, të cilën fillimisht e kishte përmendur presidenti serb, Aleksandar Vuçiç, në rastin e aplikimit të Kosovës në Këshill të Evropës, Daçiç pretendon se është zgjeruar.

Ndonëse çnjohja nuk ekziston në marrëdhënie ndërkombëtare ngase është akt de jure i pakthyeshëm, dhe është e paqartë se çfarë përfaqëson ajo, Daçiç deklaron se fushata ndërkombëtare serbe për çnjohje të Kosovës “është intensifikuar”.

Aplikimi i Kosovës për statusin e vendit kandidat në BE, ka vënë në lëvizje ministrin serb të Jashtëm, i cili i referohet moratoriumit të ndërmarrë në kuadër të Marrëveshjes së Uashingtonit, ku palët zotoheshin për ngrirje të njëvjetshme, përkatësisht që Kosova të mos aplikojë në organizata ndërkombëtare derisa Serbia ngrin fushatën e saj për çnjohje, fushatë kjo realisht asnjëherë e pezulluar nga pala serbe.

Daçiç pretendon se nga 193 shtete gjithsej sa janë anëtare të Kombeve të Bashkuara, 105 prej tyre “nuk e njohin Kosovën”, ndërsa Kosova thotë se ka njohjen e 117 prej tyre.

Pyetur nga mediat serbe “pse nuk është publikaur një listë e tillë”, kryediplomati serb thotë se “Serbia respekton pozicionin e tyre dhe nuk dëshiron t’i ekspozojë ndaj presionit të Prishtinës, veçanërisht ndaj aleatëve të tyre”.

“Duhet të jemi të kujdesshëm. Së dyti, me Marrëveshjen e Uashingtonit, ne kemi marrë përsipër të ndalojmë fushatën e çnjohjeve dhe kemi dashur të tregojmë se i qëndrojmë asaj. Sidoqoftë, Prishtina nuk e bën këtë. Dallimi në lidhje me obligimet e marra është esencial dhe gjithkush që ndërmjetëson e di shumë mirë kush është partner serioz e kush gënjeshtar”, ka thënë Daçiç, siç e citoi “Novosti”, përcjell albinfo.ch.

Kosova ka aplikuar në maj të vitit të kaluar në Këshill të Evropës ndërsa në dhjetor ka aplikuar edhe për statusin e vendit kandidat në Bashkimin Evropian, lëvizje këto të cilat kanë zgjuar në këmbë kundërshtinë e diplomacisë serbe.

Në nëntor të vitit të kaluar, Daçiç pretendonte se që nga aplikimi i Kosovës në KE “Serbia ka siguruar nëntë çnjohje” ndërsa tani e pretendon “të dhjetën”.

---