Osmani për vdekjen e Edi Shukriut: Humbje e thellë për shkencën shqiptare

Presidentja e Kosovës, Vjosa Osmani, ka shprehur ngushëllime për vdekjen e akademikes Edi Shukriu.

Ajo deklaroi të martën se vdekja e akademikes është humbje e thellë për dijet e për shkencën shqiptare, derisa e cilësoi si emër të çmuar në fushën e arkeologjisë e të historisë.

“Duke qenë ndër arkeologet e para shqiptare, ajo i vuri themelet e dijeve arkeologjike në Kosovë, së cilave ua kushtoi pothuajse tërë jetën, duke themeluar e drejtuar institucione e projekte të ndryshme kërkimore e shkencore. Njeri me vokacion të theksuar poetik, prof. Shukriu është e njohur edhe në fushën e letërsisë. Ajo na i ka lënë trashëgim disa vepra poetike”, thuhet në komunikatën e Presidencës.

Shukriu vdiq të martën në moshën 73-vjeçare.