Disa mërgimtarë nuk i paguajnë dënimet e policisë me veturat qira

Foto Arben Llpashtica

Mërgimtarët që vijnë në Kosovë marrin veturat me qira dhe shkelin rregullat në komunikacion dhe shpeshherë nuk po i paguajnë dënimet e policisë.

Bëhet fjalë për tejkalim të shpejtësisë dhe për dënime që janë regjistruar nga radarët në Kosovë dhe Shqipëri.

Me këtë femomen janë duke u ballafaquar kompanitë në Kosovë që japin vetura me qira “Rent a Car”. Faturat e tyre do t’u dërgohen në vendet prej nga vijnë mërgimtarët, të cilët janë kapur nga radarët levizës në Shqipëri ndërsa dënimet janë adresuar në kompanitë e veturave me qira në Kosovë.

Marigona Sopjani, menaxhere në kompaninë “Renta a Car Prishtina” tha për albinfo.ch se kanë marrë vendim që dënimet do t’u dërgohen në adresë të mërgimtarëve që kanë tentuar t’u ikin dënimeve të policisë me veturat e tyre.

“Policia e Shqipërisë dhe Kosovës kërkon nga kompanitë që të identifikojnë shoferët e veturave me qira që janë kapur nga radarët dhe ne kërkojmë nga klientët tanë t’i paguajnë dënimet në të kundërtën pas cdo vonese vlera do të rritet dhe mund të kenë konsekuenca edhe gjatë kalimit kufitar”, potencoi Sopjani.