Kryeministrja e Italisë shkon me traget në Vlorë

Keystone (AP Photo/Andrew Medichini)

Kryeministrja italiane, Giorgia Meloni, ka udhëtuar me traget me familjen e saj, pasditen e së hënës, për në Vlorë.

Nën masa të rrepta sigurie në portin e Vlorës, Meloni është pritur nga vetë kryeministri Rama, si dhe punonjës të konsullatës italiane, për ta shoqëruar më pas në vilën qeveritare në Vlorë, aty ku ishte parashikuar një vizitë, shkruan Top Channel.

Mësohet se Meloni ndërpreu pushimet e saj në një fermë në zonën e Puglias dhe u nis nga Brindizi me një traget linje drejt Vlorës, bashkë me bashkëshortin Andrea Giambruno, vajzën Ginevra dhe motrën  e saj, Arianna, e bashkëshortin Francesco Lollobrigida, përcjell albinfo.ch.

Mediat italiane shkruajnë se kryeministrja ka pranuar ftesën e kryeministrit Rama për të vizituar Shqipërinë, ndërsa pritet të qëndrojë 2 deri në tri ditë në Vlorë.

Kjo ftesë ishte publike në intervistat e fundit dhënë për mediat italiane, ku fokusi ishte te bumi i turistëve italianë drejt vendit tonë.

Rama e ka quajtur Melonin ‘motra e vogël e Shqipërisë’, shkruan Top Channel.