Dy orë e gjysmë pritje për të dalë nga Kosova

Pritjet në pikat kufitare për të dalë nga Kosova, po vazhdojnë. Pasditen e sotme qytetarët po përballen me pritje të gjata në vendkalimin kufitar me Serbinë, në Merdar.

Sipas raportit të Qendrës Kombëtare për Menaxhimin Kufitar, të përditësuar në orën 19:44, bashkatdhetarët po presin deri në dy orë e gjysmë për të dalë nga Kosova, shkruan albinfo.ch. Kolona e automjeteve brenda Kosovës  në këtë pikë kufitare është deri në 1 kilometër.

Pritje deri në një orë ka edhe në vendkalimin kufitar Dheu i Bardhë, ku kolona e automjeteve arrin në 500 metra, ndërsa, për të hyrë në Kosovë në këtë vendkalim kufitar pritjet janë deri në 20 minuta.

Në vendkalimet e tjera kufitare të Kosovës nuk ka pritje në hyrje, as në dalje.