Bota

Hoteli më i mirë në botë

Publikohet renditja e 50 hoteleve më të mira në botë (World’s 50 Best Hotels), e cila vlerëson hotelet në gjashtë kontinente, për strukturat e tyre të jashtëzakonshme, të cilat përfaqësojnë sektorin

E mërkurë, 27 Shtator 2023 - 20:00 albinfo.ch

Ndërkohë që pushimeve të verës po u vjen fundi, 50 Best përpiloi listën e 50 hoteleve më të mira në botë për vitin 2023, shkruan Monitor, transmeton albinfo.ch.

Ju mund ta merrni në konsideratë këtë renditje kur të planifikoni arratisjen e ardhshme në një vend luksoz.

Njëzet e një nga strukturat e vlerësuara janë në Evropë. Passalacqua, një vilë luksoze e shekullit XVIII buzë liqenit Como në Itali, u vlerësua hoteli më i mirë në botë këtë vit.

Klasifikimi u përpilua nga votimi i 580 ekspertëve ndërkombëtarë të sektorit të hotelerisë dhe udhëtimit.

Thuajse gjysma e strukturave fituese janë në Evropë

Londra konsolidon reputacionin e saj si pol turistik global, me katër hotele Claridge’s (16), The Connaught (22), NoMad London (46) dhe Savoy (47) – të cilët kanë hyrë në listë.

Në renditje janë vlerësuar edhe dy hotele të tjera në Mbretërinë e Bashkuar

Gleneagles, në Skoci, renditet në vendin e 32-të, pasi u vlerësua edhe me çmimin Art of Hospitality Award – një njohje e veçantë për përvojën e mrekullueshme në restorante dhe atë në kulinari.

Newt, në Somerset (në vendin e 37-të) fitoi edhe çmimin Carlo Alberto Best Boutique Hotel, i cili u rezervohet hoteleve në listë që plotësojnë të gjitha kriteret e një strukture butiku.

Gjashtë nga hotelet më të mira ndodhen në Francë, katër prej të cilëve në Paris Le Bristol (29), La Réserve (31), Cheval Blanc (34) e Hôtel de Crillon (50).

Hotele të tjerë të vlerësuar në renditje ndodhen në Athinë, Madrid dhe Itali.

Në Itali ndodhet hoteli më i mirë në botë për vitin 2023

Çmimi për Hotelin më të mirë në botë për vitin 2023 iu dha Passalacqua në liqenin e Como-s në Itali.

24 dhomat e hotelit shtrihen në tre ndërtesa, në shtatë hektarë kopshte, me tarraca të dekoruara në mënyrë të përsosur, plot me ullishte, mimoza, trëndafila dhe manjola.

Brenda vilës së shekullit XVIII, në pronësi të kompozitorit Vincenzo Bellini, spikat mjeshtëria italiane.

“Shumë urime për Passalacqua, e cila arriti në vendin e parë, vetëm dy vite pas hapjes” – komentoi Tim Brooke-Webb, drejtues i përgjithshëm i The World’s 50 Best Hotels.

Një hotel në Hong Kong fiton vendin e dytë

Hoteli madhështor Rosewood Hong Kong, i cili ndodhet në zonën artistike dhe të dizajnit Victoria Dockside, me një pamje të mrekullueshme nga porti, renditet i dyti në klasifikim.

Hoteli me 65 kate dhe 413 dhoma ka 11 restorante, një Spa, një pishinë dhe një qendër fitnesi.

Në Azi, 17 struktura të tjera janë vlerësuar në renditjen e World’s Best Hotels 2023, ku përfshihet Four Seasons Bangkok, The Upper House në Hong Kong e Aman Tokyo. Hoteli është vlerësuar më i miri në “The Best Hotel in Asia 2023”.

Four Seasons Bangkok në lumin Chao Phraya, Bangkok, renditet i treti

Një strehë urbane, me dizajn tërheqës e cila fokusohet sa tek argëtimi edhe tek çlodhja dhe relaksi.

Hoteli Four Seasons Bangkok, i cili ndodhet në brigjet e Lumit të Mbretërve, ka 299 dhoma dhe suita bashkëkohore, një pishinë me disa nivele, kopshte dhe një qendër Wellness me një Spa të frymëzuar nga ritualet e lashta tajlandeze.

50 hotelet më të mira në botë:

Renditja e plotë