Zbulohet një mozaik i rrallë në Durrës

Emiriana Sako, FB

Në Durrës, një ekip arkeologësh zbuloi një mozaik të rrallë që nga vlerësimi paraprak duket se i përket fundit të shekullit  I dhe fillimit të shekullit II  të e.s. dhe të kohës së ndërtimit të Amfiteatrit të Durrësit.

Luan Përzhita, arkeologu që drejton ekipin, tha për Zërin e Amerikës se mozaiku është pjesë e dyshemesë së një vile luksoze me pamje nga deti dhe përngjan me mozaikun e gjetur disa vite më parë në një vilë romake në Diaporit të Butrintit.

“Mozaiku është punuar me gurë ngjyrë blu dhe ngjyrë pane dhe paraqet figura gjeometrike dhe floreale”, tha Përzhita, përcjell albinfo.ch.

Ai shton se mozaiku është me një sipërfaqe rreth 15 metër gjatësi dhe mbetet të shikohet gjerësia e tij pasi një pjesë ndodhet e mbuluar nga një masiv dheu mbi 6 metër e lartë ku ende nuk është depërtuar me gërmim.

Mozaiku u zbulua gjatë punimeve për rindërtimin e një shkolle në Durrës që ishte dëmtuar nga tërmeti i katër vjetëve më parë, përcjell albinfo.ch.