Berisha thotë se nuk do të paraqitet në Gjykatë

Ish-kryeministri shqiptar Sali Berisha thotë se duket mos shkuar në Gjykatën e Posaçme për hetimet e nisura për korrupsion pasiv, për privatizimin e ish-kompleksit sportiv “Partizani”, po mbron Kushtetutën dhe qytetarët. Në konferencën për mediat, Berisha shprehu gatishmërinë e tij për të shkuar në gjykatë, nëse do nga ana e drejtësisë do të merrej autorizimi nga parlamenti, përcjell albinfo.ch.

“Sali Berisha garanton çdo qytetar se unë po mbroj qytetarët, duke mbrojtur Kushtetutën, përndryshe unë 100 herë shkoj pa asnjë lloj…Bile me një projekt të fuqishëm për të zbardhur të vërtetat aty ku nxihen, ndaj dhe e ftoj këtë burracak, këtë frikacak të ketë kurajo të vijë e të votojmë amandamentin i cili u heq deputetëve çdo mbrojtje, që i dallon ata nga qytetari i thjeshtë, në raport me sistemin e drejtësisë.”

Ftoi kryeministrin Edi Rama që të votojë në parlament heqjen e mbrojtjes që u jep mandati i deputetëve.

“Urdhëro të heqim këtë nen, ai kontrollon çdo qelizë të drejtësisë, unë jam gati të barazohem me qytetarët. Por se lejon ai këtë!”

Krahas protestës së deputetëve në parlament, paralajmëroi protesta të vazhdueshme popullore.

Berisha thotë se drejtësia nuk ka gjetur asnjë shkelje të ligjit prej tij në privatizimin e ish-kompleksit sportiv “Partizani”.

Pas mbledhjes së Kryesisë ditën e mërkurë, të premten PD e drejtuar nga Berisha mbledh këshillin Kombëtar, në të cilin do të miratohen aksionet e ardhshme të partisë.